.....

اقطع وريد الحنين فيا ..وأدى لنظرة الامل بيك غفوة ..وأسحب كل الى ليك فيا ..

وأدينى جرعة مسكنة من كل حاجة مش ممكنة بينا أنا وأنت ..

علمنى مكونش بيك أبدا ..ومبقاش ليك ابدا..علمنى اسكت قلبى لما يسأل عنك ..علمنى أكون انانية ..علمنى أكون بيا ..علمنى مدورش عليك طول اليوم لما اغمض عينى ..

أزاى ممكن أكون وصلت للدرجة دى بيك ؟

كل محاولات قلبى للصمود ادامك أنت بتفشل ..كل السدود الى بعلى فيها كل يوم طوبة طوبة بتتهد عليا أنا وبس ..

صحاب ..حبايب ؟!!

اصعب حاجة لما تيجى تحط حبك تحت مسمى ..وتحط ناس ادمنتهم خلاص فى كادر ..لما تيجى تعلق صورهم جوه قلبك ..وتكون عاوز تحط صفة ليهم ومتلاقيش ..

بس الاصعب أنى مكونش عارفة بعد كل ده ايه الى بينا ؟ ايه الى ليا فيك ؟ وانا ايه عندك ؟!!

بستغرب كل حاجة بينا ..وبكره ساعات كتير نفسى ..وبقسى عليا ..بشدنى من ادامك زى العيل الصغير الى بتشده لما يجى يلعب فى الكهربا..وهو مقتنع انه مش هيحصله حاجة ..وانت وبتشده خايف عليه ليموت ..

قولى أنت كام صدمة خدتها ..كم فولت عالى كهربنى وخلانى اترعش من جوايا ..كام مرة قلت مش هاجى وجيت ..كام مرة قلت مش هكلمك وحنيت ..كام مليون سؤال جوايا نفسى اسأله ليك وخايفة تكون اجابتك مش الى انا عايزاها ..

 

بتمرجحنى فى كل حاجة بينا ..بتمشينى فى كل المراحل ..بتتحكم فى مزاجى بافعالك ..ازاى ؟؟

ازاى بتقدر تخلى حبى ليك اكتر من حبى لنفسى ..ازاى بتقدر تخلى حبى ليك ورفضى ليك اد بعض ..

ازاى بنزل من فوق اوى لتحت اوى اوى ..وانا مش عارفة اى حاجة غير انى ادمنت وحعى معا بالطريقة دى ..اتفقنا فى سرنا اننا هنتعامل بالتجاهل ...اننا مش عارفين احنا ايه من بعض ..خايفين نخسر بعض ..يمكن ؟؟

بس الاصعب والاغبى ان كل كلمة بينا بتقول بحبك ..كل ما بتسيب الدنيا كلها وتيجى عندى انا بالذات تحكيلى ..كل مرة بتقول ربنا يخليكى ليا ..كل مرة بتسأل وتطمن عليا ..كل كلامنا بليل ..كل كلمة انتى صاحبتى ..وكل كلمة انت اخويا ..بنفكر بعض ولا بنفرمل بعض

الحقيقة انى غريبة بيك وحالتى اغرب من غيرك

موجوعة بيك ووجعى بيعلى وانت مش موجود

نفسى اخسرك وخايفة اخسرك ومرتاحش

نفسى محبكش وقلبى كل حاجة فيه بتقول بحبك

نفسى اواجهك فى يوم واقولك احنا ايه والاقى اجابة ترضينى

نفسى ارجع تانى لاول مرة كلمتك ..تكون عادى ..ولو فى اقل من العادى عايزاك تكونه

مش هستنى منك كلمة ..ولو اتقالت مش عارفة هترضينى ولا هعتبرها جات متاخر ؟

نفسى ارجع لنفسى تانى ..واكون أولى بيا ..ومكونش مدمنة الوجع بيك ..

نفسى لما افتح قلبى وامشى جواه ..واتكعبل فيك ..الاقى الحكاية خلصت وعادى ..ومفيش حاجة عورتنى ..

نفسى لما تقولى وحشتينى ..متهزنيش ولا استنى منك اى حاجة

انا اقوى بيا ..واضعف بيك

انا لسه بيا ..وقلبى مل انه يستنى

النهاية قربت ..والصحوبية مش حل بينا  ..وقريب هوصل لمرحلة يا كل حاجة يا ولا حاجة ..