ضفيرة التعافــــــــى..

 

مشرط ...أبرة ..خيط .."ضفيرة التعافــــــــــى "

كلمة بتقولها كتير جواك ..كل ما بتكون خايف من حاجة مش عارفها  "تعبت "
هو ده بس الاحساس الى انت عارفه كويس ..تعبت من حاجة مش عارفها ..او عارفها وبتستعبط ...بيبقى السكات والنظرة التايهة الى بتبص فى كل مكان ومش لاقية الى بتدور عليه ..

الى بتخليك مش تايه فى سكتك ..بس لوحدك ..
الى بتخليك نفسك بس فى علامة فى طريقك تقولك كمل او ستوووووووب

غمض عينيك دلوقتى حالا عن كل حاجة خايف تشوفها ..

خدلك نفس طويل شوية ..أمسك ورقة وامسك قلم ..اكتب وجعك بايديك حالا ..

طريقك ماشى ماشى بيهم أو من غيرهم ..هو بس أحنا الى بنقنع نفسنا أننا مش عارفين نكمل ..لسه فاضل مية مليون حاجة منهم جواك ..لو ركزت وشفت هتلاقى ان الحجات دى فى الاساس –أنت- الى عاملها ..

مين على سقف حلمك غيرك ..مفيش

مين علق كل حياته على شماعة واحدة ..مفيش

مين غير فى نفسه عشانهم ..مفيش

مين غمض عينه على اول حقيقة قالتلك "Stop" او لف وارجع تانى ..مفيش

مين أداهم مساحة جواك ..مش انت

مين لما دخلوا ..فتح قلبه وغير ديكوره ..وشيلت ناس وشيلت كام حلم على الرف عشانهم ..مش أنت

مين الى أداهم مفاتيحه فى ايديهم وقالهم البيت بيتهم ..مش أنت

يبقى ليه زعلان ؟؟ ليه مستنى ؟؟

لو مستنى يحسوا أنهم غلط ..انسى

لو مستنى حد يرجع نور قلبك ويشغل الفيشة من تانى ونقول ده بس نور اتقطع ورجع علطول ..انسى

لو مستنى حد يقومك ..انسى

لو بتحن ..وموجوع ..مشتاق..بتفكر فى ناس كتير ..بتسأل مية سؤال ومفيش ولا اى اجابة غير

مفيش..معرفش ..ولا اى حاجة

يبقى حالا ..أكبر ..أتعلم ..صرخ ..ابكى ..أنزف ..اتكعبل فيهم..اقع ..افتح تفاصيلك معاهم ..ودور ..وافهم ..وقوم ..

امسك مشرط ..افتح قلبك ..ابتر كل الى ليهم جواك ..خلى ذكرياتك ليك أنت

شيل شوقك ..شيل ضعفك ..شيل انتظارك ..أرمى الساعات القديمة ..اظبط ساعتك الجديدة على دقتك أنت وبس ..ارمى بقى كل الكراكيـــــــــــــــــــــــــــــــــب ..كفاية عليك كل الى ضاع

لو بتنزف من الالم ..مش هتموت ..هتعيش..

امسك ابره وخيط ..ضمد وجعك ..وامسح كل الى ليهم فيك ..خليك لنفسك ..

الجرح معلم أكيد ..بس هيداوى وهيلم ..لما تبطل تمشى ايديك كتير عليه ..

هتطيب والدنيا هتداوى قلبك ..بيك

خليك فاكر محدش طبيبك غيرك ..أجدل ضفيرتك ..وأتعافى بمزاجك ..هتفرق كتير قبل سوس الوجع  ما ياكل قلبك ..

هنـــــــــــــــاك ...

هناك ...

هناك بس لما باخد نفس عميق ..يحسس قلبى بدفا مزعوم ..
وضمة ايد منى ليا ..تمشى على كل كل خدش جوايا ببطء متعمد لاحسن اصحى حاجة ..
مع مشى على طراطيف صوابعى لاتكعبل فى حاجة وافتح حاجة انا مش ادها هحاول اكتب ..

 

بفرض على نفسى فى محاولة عبثية انى مبخطش بابى ..ولا أدور فى كراكيب قلبى من جوه .. الا على فترات مش قريبة ومش بعيدة فى نفس الوقت ..

احساس غريب لما بتفرج على نفسى من فوق وكانى مش- انا- نفس الشخص الى عايش الاحداث ..وعلى طريقتى فى التعامل مع المواقف الى شكلتها اكتر ما هى شكلتنى ..

أعترف انى كنت فى البداية كائن ضعيف نسبيا ..مبيعرفش يتعامل مع خيبات توقعاته و خسارته الانسانية ..بس لما عرفت ان الدنيا دى لازم تتاخد عافية ..ولو استنيت الحاجة تيجى بالهداوة مش هتيجى وانا تحولت لكائن آخر ..

اكثر انفعالا بس اهدى نسبيا ..وصوت الدوشة الى جوه هدى كتير عن زمان  ..

لما مبقاش فى ثوابت فى حياتى بس فى مناطق ارتكاز على الاقل بتخلينى اتوازن نفسيا الى حد كبير واغلبها مش متعلقة بأشخاص ..متعلقة بيا أنا وبحجات ثابته ..متقدرش تبعد ..ولا تقدر تخذل ..ولا تقدر تكون لحد تانى غيرى ..ده مريح لحد كبير..

لما قررت انى أحط بينى وبين الدنيا لوح أزاز سمكه كفاية يخلينى ابعد عن اى حاجة وكل حاجة  وفى قلب اللوح ده انا موجودة ..

جربت أكون كده اشوف حجات ومحسهاش ..ونبض قلبى يبتدى يقل تدريجى ..كانه قرب يختفى

واعمل نفسى مش شايفة ..عشان انا عشت ده قبل كده ..ومش هوجع نفسى تانى بيه ..ولا هحاول اوجع قلبى بنفس المشهد مرتين ..

بقيت بتعامل مع نفسى بحرفية شديدة وده ميمنعش انى لما بقع بتكون الوقعة
هوووووووووووووووووووووووووووووب شديدة جدا ..لان كل الحجات الى كنت بقنع نفسى بيها ممكن تكون فشلت ولازم اقوم تانى ..بأسرع ما يمكن .

انى افضل واقفة على قلبى من بره ..اقول باسورد جديدة عشان محدش هيعرف يدخله غيرى وباختيارى وبقرارى ..

انى اخربش حيطانى وقعت وجعى وانزف لوحدى ..وابكى لوحدى ..واقوم لوحدى ..

ان محدش لازم يكون هناك ..هناك ده مكانى أنا وبس ..

اكتشفت ان كل ما معرفتك بالناس زادت بقى الوجع اكتر ..لانهم بقوا حافظينك وعارفينك بشكل ما ..يخليهم عارفين ردود افعالك من قبلها ..وانه بيلعب شطرنج معاك ..

بيعمل كزا وهو عارف ان اخرك كزا..

وان ممكن رد فعلك يكون محصور فى حجات معينة ..

قيس على ده كم الوجع الى انت وبس هتحس بيه ..وجع انك كنت كتاب مفتوح ..وجع انك آمنت ومخونتش ان فى حركة هتتعمل عشان توجعك ..ووجع انك هتجبر نفسك انك تغير ردود افعالك دى عشان متلاقيش نفسك بتمشى على خط مرسمولك ..

من هنا وبس لازم انت الى تقرر يا تعيش ملك يا تعيش عسكرى ..

على كل وجع حسيت بيه ..وخيبة امل ..وانتظار لاى حاجة ..ومحصلتش
على كل شخص فارقته بمزاجك ..او فارقك ومفرقش معاه مزاجك
على كل حاجة كنت مستنى تحصل وموقف حجات كتير عشانها ..وحد قالك مكنش لازم تستنى

على كل وعد التزمت بيه بالحرف ..وناس ملتزمتش معاك باى حرف قالته

على كل كسر جوه منك ..مقدرتش تلمه وتلزقه تانى ..وكل خدش مستخبى بحرفنة عشان متوريهوش لحد
على كل حكاية موجودة جواك انت ..وكل حدوتة مخلصتش ولسه بتقنع نفسك انها خلصت

على كل مرة اتكعبلت فيها وقومت سندت نفسك فيها بسرعة ..واكتشفت انك انسان لاول مرة بتشوف نفسك

عن كل ده هيكون تدوينى لمدة 365
محاولة لمعرفتى اكثر واكثر ..